A plataforma editorial Bailarete vai presentar este venres, a partir
das 18:30 horas, en LIBROS PARA SOÑAR, un álbum infantil adicado á figura e á
obra de Rosalía de Castro.
“Alborada”, publicado na colección Alalá, combina os
versos da gran poeta galega cos contos e mais coa música, para favorecer que os
nenos e nenas se acheguen á poesía e aprendan a apreciala cando sexan maiores.
As historias desta sesión de
contacontos parten de diferentes poemas rosalianos aos que lles porán voz a
ilustradora do libro, Irene Silva, Fátima Granja, do Centro Cultural A Merced
de Chaín, e Rita Bugallo, filóloga e editora de Bailarete. Tamén participará o
gaiteiro Xaime Estévez, co acompañamento dos nenos e nenas do Centro Cultural A
Mercede na interpretación das cantigas.
“Alborada” é un libro
para ser recitado, contado e cantado; unha obra na que os poemas se transforman
en historias atractivas para o público infantil; unha proposta de lectura que
se plasma nun espectáculo lúdico e participativo.
“Miña santiña, miña santasa”,
“A festa Marica” e “Un repoludo gaiteiro” son as tres composicións arredor das
cales se artellará a sesión de contacontos, con diversas propostas de narración
a partir da utilización de monicreques, imaxes e músicas. Melodías como a
“Alborada de Rosalía”, coa que Xaime Estévez vaille dar a benvida ao público
desta sesión especial, no ano no que se cumpren os 150 anos da publicación de
“Cantares gallegos”.
Dende a súa publicación o
pasado mes de abril, esta é a terceira presentación da “Alborada” de Bailarete,
que xa se puxo en escena na Fundación Rosalía de Castro, en Padrón.
LIBROS PARA
SOÑAR: 986 43 37 68 | lps@kalandraka.com
Ningún comentario:
Publicar un comentario